شحاذ دخل المعرض ، كان ماسك كيس كبير فية مناديل بيسترزق منها بجانب الشحاتة دخل على غفلة فجأة .. لقينا الراجل ساب الكيس على الأرض ، وقعد سارح فى الصور .... بيتفرج عليها


شخص ما دخل المعرض وكان (أبكم) مش بيتكلم ، دخل المعرض وبعد ما شاف أحد الصور .. رجع تاني ، وكنا فريق المعرض اللي قاعد على الترابيزة مش فاهمين حاجة خصوصا اننا معندناش خبرة كافية فى لغة الصم والبكم ، المهم .. بعد محاولات مستفيضة روحت معاة على الصورة اللي أثارت مشاعرة وكانت فى قسم صور عدوان 1956 ، وفهمت بالعافية منة أن اللي فى الصورة دى يبقي " أخوة الشقيق"



بعد نقل المعرض من شارع طرح البحر مباشرة ، الى الجانب الأخر .. كان ضروري وقتها يكون معانا شباب تشيل شغل الفراشة اللي ملزق علية الصور لآننا مش هننقل المعرض صورة صورة ، وأول ما جاءت لحظة تغيير المكان .. وجدت الشباب متعاون جدا ، ورغم الإحباط .. كانوا بيتنافسوا على نقل الفراشة وتغيير المكان ، بدون إنتظار تعليمات أو حد يقول لهم : تعالوا شيلوا معانا .. غير الناس اللي من أول لحظة من الصباح الباكر وهما فى ميدان العمل .. غير طبعا الناس اللي سهرت معانا لوقت متأخر جدا كل يوم ، غير البنات اللي كانوا مسئولين عن البيع والشراء ، والأعضاء اللي كانوا بيوزعوا الدعايا ، والإتصالات من الأعضاء الكرام من مختلف الدول للإطمئنان على سير العمل كل لحظة .. والأعضاء اللي كانت بتسجل لقاءات حية بالصوت والصورة مع الزوار .. وعاشق بورسعيد اللي بعت ملف الفيديو اللي كنا هنذيعة فى البروجيكتور ومحصلش نصيب .. غير البنات اللي كانوا بيعيطوا بالدموع لما حسوا أن المعرض ممكن يتلغي .. ناس مخلصة وبتحب بلدها وبتحب تشتغل بجد .. هما دول بورسعيد أون لاين ..!