بورسعيد مدينتنا الجميله, نشأه غريبه, تفرد وإختلاف. نظره على نشأه بورسعيد والظروف التي أدت إلى تفردها بقلم السيد أحمس.

كتب: أحمس (بورسعيد أون لاين) 

اتفقنا إننا حانتكلم عن بورسعيد الأصيلة أو بورسعيد التي لا نعرفها وأول حاجة لازم نعرفها عن بورسعيد هو التفرد اللي تمتاز به هذه المدينة الغريبة ذات التاريخ القصير بحكم الزمن الطويل بما مر بها من أحداث وعموما تفرد بورسعيد مش كله إيجابي بل بالعكس يمكن تفردها خلاها تشتهر بالعديد من البلاوي ..
ما علينا ..
أول ملامح هذا التفرد هو النشأة في حدود علمي أنها أول مدينة في التاريخ الحديث تنشأ بقرار إحنا نعرف إن نشأة المدن نتيجة تجمع سكاني ناتج عن نشاط اقتصادي في منطقة ما .. إلا بلدنا .. فقد صدر عام 1855 قرار خديوي بإنشاء مدينة علي مدخل قناة السويس تسمي بورسعيد علي اسم الخديوي اللي أصدر القرار وذلك لخدمة الملاحة في قناة السويس كل بلاد الدنيا تنشأ بناس يعملوا بلد إلا بلدنا عملوها الأول وبعدين جابو لها الناس .. فيه بعد كده تفرد ؟!

ثاني ملامح هذا التفرد هوه الناس اللي جابوهم .. أنتم فاكرين أفلام الغرب الأمريكي لما أمريكا زحف عليها البشر من كل مكان باعتبارها أرض الفرص الجديدة . . آهي بورسعيد بدأت كده زحف عليها البشر من كل مكان . . من الجنوب زحف الصعايدة .. ومن الغرب زحف الفلاحين والدمايطة .. ومن الشمال زحف الطلاينة واليونانيين والقبارصة .. ومن الشرق زحف الشوام وطبعا الزاحفين دول طفشانين من بلادهم .. يعن جايين قشلانين . . استطاع هذا الخليط العجيب الغريب من البشر أن يكون مجتمع يعرف في علم الأنثربولجي اللي هوه علم الأجناس بمجتمع الكزموبوليتان وأول ملامح هذا النوع من المجتمعات هوه التفرد الثالث

التفرد الثالث بقي هوه إن مجتمعات الكزموبوليتان بتنحي دائماً نتيجة تكوينها العجيب إلي نزعة استقلالية وعلي فكرة تاريخ المنطقة فيه هذه النزعة منذ قديم الأزل وكتب التاريخ بتقول إن في الأسرة الرابعة والعشرين من التاريخ الفرعوني استطاع المالك سمنديس الثالث أن يستقل بشمال البلاد ويعلن مملكة بر آمون نسبة للإله آمون ويقال أن الاسم تطور إلي برمون ثم برما ثم فرما وكمان في القرن الثامن الهجري استطاع عبد العزيز بن الجروي أن يستقل عن دولة الخلافة ويعلن مملكة الساحل في تنيس مش كده بس ده في الستينات بعد ماتش كوره بين النادي المصري ونادي السويس علي الصعود لدوري الدرجة الأولي وانهزم المصري نتيجة تواطؤ الحكم خرجت بورسعيد في مظاهرات صاخبة وأغلقوا أقسام البوليس وعمت الفوضى وكان هتاف المظاهرات الرئيسي ( عاشت بورسعيد دولة مستقلة ) وحاجات حصلت بعد كده أنا وأنتم عارفينها تبين إننا مش شعب متفرد وبس لأ وكمان شعب مرازي .. عارفين ليه ؟ .. بعدين أقولكم . .

رابط الموضوع: http://www.portsaid-online.com/xmb/viewthread.php?tid=7720

التعليقات & التفاصيل (4)

2. جميل جدا أضيف بواسطة همسه , في 20-05-2008 12:05 بصراحة انا مش عارفة اشكرك ازاي بجد الموضوع ده ميه ميه ملوش حل خطير لذيذ مش لاقية كلا م بجد أعبر عن اعجابي الفظيع بالموضوع ده بجد حاجة كلنا نفخر بيها والحلو اللي فيه كمان انه مكتوب بطريقة لذيذه فكاهيه إلى حد ما تجذب القارئ بجد 10/10 أبلغ إدارة الموقع

4. بورسعيد أضيف بواسطة السيد عرفه , في 03-06-2008 20:04 كلام جميل جدا ونشكركم على الموقع كان نفسى أكون من المشاركين معاكوا أقترح موضوع مسابقة اسمها ((بورسعيدى أصيل يا بنى )) يكون فيها طرح أسئلة عن أماكن كانت موجودة حتى العودة من الهجرة وتكون جايزيتها بطاقة لصورة من بورسعيد مكتوب عليها (( بورسعيدى أصيل يا بنى )) مثال :- كام طلمبة مية كانت فى شارع 100 - مثال أخر :- الأتوبيس اللى كان بيمشى فى كسرى كان لونه ايه - مثال :- الناس كانوا يروحوا الجبانة كانوا يخدوا ايه معاهم يفرقوا رحمة على الميت 000 انا جربت الموضوع فى رحلة واحنا راجعين من القاهرة وكان أكثر من رائع --- شكرا نرجوا الرد أبلغ إدارة الموقع

أضف تعليق & التفاصيل
من فضلك اضف تعليق يتناسب مع الخبر. أي اهانات أو شتم سيتم حذفها. لا تنس اضافة الكود الأمني الموجود بالأسفل.
الإسم:
البريد الإليكتروني
الصفحة الرئيسية
العنوان:
BBCode:
التعليق:
الكود الأمني:*
	الإشتراك في التعليقات حول هذا الخبر على البريد الإليكتروني