بورسعيد أون لاين - بورسعيد حبيبتي

الصفحة الرئيسية

أرشيف الأخبار

من بستان المنتدى

بورسعيد حبيبتي

في عشق بورسعيد كتبت عروس القناه "بورسعيد حبيبتي"

سألونى هى مين حبيبة قلبى أنا

اللى فتحت عينى لقتنى بحبها

و أول كلمة ليه نطقت بأسمها

و أول خطوة ليه كانت على أرضها

و كل ما اكبر بيكبر فى قلبى حبها

لفيت مدن كتير ملقتش زيها

فى جمالها و جوها و طيبة قلبها

بترحب بالغريب و بتاخده فى حضنها

جربت لما تزهق تمشى على شطها

تحكى اللى بيك و تشكى و تناجى بحرها

شفتها فى المغربية بتودع شمسها

و قمرها الحلو يطلع يزيد من حسنها

يرسم بنوره صورة على صفحة بحرها

صورة عمرى فى حياتى ما شفت زيها

احكيلكم عنها ايه و الا عن مجدها

واجهت عدوان ثلاثى ببسالة شعبها

و عيون مهران دليل على قوة اهلها

ع السمسمية العشرى يتغنى باسمها

عرفتوا هى مين حبيبة قلبى أنا

دى بورسعيد حبيبتى و الله بحبها

بقــــــــــــــــــــــــــــــلمى

بورسعيدية و افتخر

رابط الموضوع:

http://www.portsaid-online.com/community/viewtopic.php?f=13&t=51781

أضف لموقعك | المشاهدة: 845

التعليقات & التفاصيل (8)

1. أضيف بواسطة محمد احمد, في 07-07-2008 04:24
تسلم الايد اللى كتبت ويسلم كل ومن حبيك يا بلدى بورسعيد مش بس فى قلبنا فى عروقنا وبحرها بيجرى فى دمنا ما تحسش بيقمتها اللة لما تبعد عنها وانا هنا من ابو ظبى بسلم عليها وابوس ارضها وهنى كل واحد بيغنى باسمها

أبلغ إدارة الموقع

2. الله عليكي
أضيف بواسطة ريري , في 08-07-2008 21:51
الله عليكي يا بلدي :zzz

أبلغ إدارة الموقع

3. أضيف بواسطة احمد جمال, في 27-08-2008 13:01
والله وانا كمان بحب بورسعيد ودى اول مره ادخل على الموقع ده واول مره اقرا هنا عن اعتراف البورسعيدى باصله
لانى عشت فى البلد سنين لقيت ان اغلب اهلها وبنسبه يمكن تعدى 95% بينكروا اصلهم ويخاف جدا البورسعيدى ان يقول ان اصله من الارياف او اصل اهله اوجده مثلا خوفا من ان يتقال عليه فلاح فى حين ان بورسعيد عمرها من عمر القناه بس فهل من المعقول انه عند بنائها جابولها ناس من يطاليا وتركيا وقبرص يعمروها
طبعا لا لان فعلا اهل بورسعيد من نفس نسيج الشعب المصرى والجمله اللى كنت دايما اسمعها منهم وهيه ’ لا اخويا انا من هنه بورسعادى ابا عن جد والفلاحين هما اللى ملو علينا البلد’ فكنت باستغرب من امر الشعب ده وبعدين ما اللهجه البورسعيديه اكبر دليل على ان اهل البلد دى من بلاد مجاوره زى ارياف المنزله والمطريه ودمياط والشرقيه والقنطره ده غير الصعايده اللى ماليين البلد فى النهايه ده مش عيب 00 فى القاهرة تلاقى الوضع مختلف تمام هناك لقاهريين ديما بيعترفو باصولهم الريفيه وبيتباهو بيها نا من عيله فلان اللى من البلد لفلانيه وهكذا الا البورسعيديه
ونادرا لو اعترفلك البورسعيدى باصله حتى لو عرف ان نت كمان اصلا من البلد الفلانيه
لكن والله انا بحب البلد دى وبحب فى اهلها طيبة قلبهم على شوية من لؤم الفلاحين اللى لسه جواهم وشكرا لصاحبة الابيات السابقه وشكرا لهذا الموقع المحترم واسف للاطاله

أبلغ إدارة الموقع

4. أضيف بواسطة احمدزغلول, في 09-10-2008 03:04
مناطق تسيب ببورفؤاد
خلف نادى الحى
ارض خضراء اصبحت ملاهى
مين سمح ولصالح مين ومن اين تتغذى بالكهرباء ببلاش
ونقول تخفيف الضغط لصااااااااالح مين :zzz

أبلغ إدارة الموقع

5. أضيف بواسطة هذا البريد محمى من المتطفلين , تحتاج إلى تشغيل الجافا سكريبت لمشاهدته , في 04-11-2008 14:40
طول عمرنا نعيش فى بلدنا فى امان كان اولادنا الشباب يقومون بحماية بناتنا فى احياءنا كانت من يتحكم عملها فى الخروج مساءا كالدكتوره او الممرضه كانت ترجع لمنزلها وتسير فى شوارع المدينه وهى حاسه بالامان هى دى بورسعيد وهم دول اهالى المدينه و ياريت نرجع لسلوكنا القديم ولسمات الشعب البورسعيدى الطيب الحر النظيف حتى ترجع بورسعيد كما كانت من قبل بلد الامان

أبلغ إدارة الموقع

6. اعملوا معروف انقذوا الحى
أضيف بواسطة هذا البريد محمى من المتطفلين , تحتاج إلى تشغيل الجافا سكريبت لمشاهدته , في 04-11-2008 14:54
بالطبع كلمات جميله لايقولها غير من يحب بلده فعلا واجمل ما فى شعب بورسعيد انه دائما فخور بالبلد وانه من اهلها ولأنى من اهل ومن مواليد هذه البلد الجميله فها انا اصرخ بأعلى صوتى واقول لكم اعملوا شيئا من اجل هذا الحى المهدد بكارثه وكأن هناك قنبله موقوته بسبب كشك الكهرباء المقيم على رصيف مكتبة الطفل امام مستشفى النصر هل لا يوجد مسئول واحد يحاول ان يأتى لرؤية ما هو موجود افعلوا ايه شىء اعملوا معروف

أبلغ إدارة الموقع

7. alex
أضيف بواسطة noha, في 05-11-2008 13:23
انا اسكندرنيه ونفسي اجى اشوف بور سعيد لانى عمري مازورتها

أبلغ إدارة الموقع

8. الله عليكى يا بورسعيدية
أضيف بواسطة سامح , في 07-11-2008 21:53
بجد كلمات جميلة جدا اوى اوى و انا كمان كاتب عنها حاجات كتير اوى

أبلغ إدارة الموقع

أضف تعليق & التفاصيل
من فضلك اضف تعليق يتناسب مع الخبر. أي اهانات أو شتم سيتم حذفها. لا تنس اضافة الكود الأمني الموجود بالأسفل.
الإسم:
البريد الإليكتروني
الصفحة الرئيسية
العنوان:
BBCode:
التعليق:
الكود الأمني:*
	الإشتراك في التعليقات حول هذا الخبر على البريد الإليكتروني