|
مشكلة المعديات فى بورسعيد |
|
|
 لا شك أن ( هيئــــــــــة قنـــــــــــــاة السويس )ساهمت وتساهم بفاعلية لخدمة مجتمع القناة ومن أهم الخدمات العظيمة التى تقدمها هوالمساهمة فى ربط ضفتى القناة ببعضهما
حيث أن هذا المرفق بما يمتلكة من أسطول معديات بحمولتة الكبيرة .
وخلال السنوات القليلة الماضية أصبح لا يستوعب أعداد السيارات المتزايدة العابرة بين بورفؤاد وبورسعيد وللامــــــــــــــــــــــانة .. فأن ( هيئة قنــــــــــــــــــاة السويس ) لا تدخر جهدا فى سبيل رفع كفائة هذا المرفق بما يتناسب مع الزيادة
المطردة فى حركة عبور السيارات ولكن التوسع العمرانى ببورفؤاد وما ينتظرة من المشروعات المستقبلية ( لشرق التفريعة ) يجعل ا لأمـــــــــــــــــــــــر أشد صعوبة عما هو قائم الآن علاوة على زيادة ا لأزدحــــــــــــــــــــــــــام فى فصل ( الصيف )
نتيجة قدوم أعداد كبيرة من المصطافين بسيارتهم من خارج المدينة
مما يزيد من تكدس السيارات بميادين المعديات
على جانبى المرفق وأرتباك حركة المرور أن ما يعانية ساكنى مدينة بورفؤاد من مشكلةيومية تكاد تعصف بأعصابهم و ا لأمر يشتد صعوبة فى أوقات حدوث الشبورة حيث تعطل المعديات تماما وتصبح بورفؤاد عبارة عن ( جزيرة ) منعزلة طول
فترة وجود الشبورة وناهيك .. أذا كانت هناك حالة مرضية تستدعى نقلها الى مدينة بورسعيد أو مسافر مرتبط بميعاد أقــــــــــــــلاع طائرة فهل يعقل أن يكون هــــــــــــــــــــذا هو الحــــــــــــــــال ؟ فى وقت نستشرف فية مشروعات واعدة ( بشرق التفريعة ) ذلك إذا أغفلنا ما يعانية سكان بورفؤاد من متاعب يومية بسبب أزدحام
المعديات أن هذة المشكلة ( وجب ) أن تعطى أهمية قصوى على الأقل من أجل عيون ( المستثمر ) الذى يبحث عن ( كوبرى ) أو ( نفق ) يعبر منة الى بورفؤاد بدلا من المعديات التى
أصبحت لا تواكب عصر التكنولوجيا الحديثة حيث يضع إستثماراتة التى تعود على بلدنا بالخير آملين من السادة المسئولين ا لأخذ فى ا لأعتبار لحل هذة المشكلة فى أقرب وقت ممكن و ا لأمـــــــــــــــر مطروح على حضرات ا لأعضاء للحوار وفى انتظار أقتراحاتكم
ومشاركاتكم شكرا لكم جميعا
وسلام الله عليكم ورحمتة وبركاتة
( عـــــادل منـــدور )
 أضف لموقعك | المشاهدة: 1236
1. شكرا لمرفق المعديات
أضيف بواسطة شكرا لمرفق المعديات  , في 04-09-2008 13:29
شكرا لمرفق المعديات ولكن مع التحفظ علي نظافة المعديات حيث ان النظافة بها صفر في امكن جلوس الركاب ووجود ملصقات وملاحظ ايضاً موضوع باب المعديات غير صالحة
|
2. عيب يكون فى حاجه اسمها معديه اصلا!!
أضيف بواسطة
هذا البريد محمى من المتطفلين , تحتاج إلى تشغيل الجافا سكريبت لمشاهدته
, في 09-09-2008 19:49
والله بجد عيب ما نعرفش نعمل كوبرى ولا نفق ولا نتصرف ف اى طريقه او ع الاقل لغاية منحل المشكله نزود عدد المعديات يعنى مثلا عندنا 3 مراسى نخلى كل مرسى معديتين يشتغلو عليه وانا بخص بالذكر الرسوه اللى مليانه فوضىىىىىىىىىىىىىى
وكووووسه..كله بيعدى من الجمب ومحدش بيكلمه وياخد حق غيره..فين اصلا المرور..المفروض نحط عسكرى مرور هناك ياخد مخالفات الناس اللى بتخالف القانون وبتعدى ف غير دورها..وده كحل مؤقت لمشكلة المعديات..
الهيئه مشغله معديتين بس ف الرسوه ولما تحن علينا تخليهم 3..بالذمه مش عيب على مؤسسه كبيره زى دى مكاسبها بالمليارات تشغل بس معديتين وتسيب الناس تقتل ف بعض...
بالذمه مش عيب اصلا مكن ومواتير المعديات دى...ليه ما يخلوهاش سريعه جدا وتنجز مواعيد الناس..مع ان اللى عايز حاجه بيجيبها..المهم يدفع..طب ليه ما تدفعش وتسد كلام وشكاوى الناس لغاية منشوفلها حل اذا كان كوبرى او نفق!!؟؟
يارب يصلح الحال!
|
3. PTS
أضيف بواسطة
هذا البريد محمى من المتطفلين , تحتاج إلى تشغيل الجافا سكريبت لمشاهدته
, في 11-09-2008 01:22
السلام عليكم
بورسعيد من محافظات مصر التى مرشح لها ان تكون من رابع محافظات مصر من حيث النظافة والموقع والمرافق الخ....
مع مراعاة انها احسن من محافظات تانيه كتير بتعانى من عدم توافر المذكور مؤخرا تماما. ( اسأل مجرب )
حتى لا يطول الكلام المحافظه دى اللى لو اهتم المسؤلين بمرافقها مع التوسع الملحوظ المقام حاليا ممكن تكون محط انظار نخبة من الشركات العملاقة مثل الشركات المقامه فى جنوبها ,
ومن ناحيه سياحية لتاريخها اولا وموقعها ثانيا وده طبعا بيعود على مصر كلها .
وعلشان كل ده يبقى مش خسارة فيها النفق
|
4. أضيف بواسطة zico, في 17-09-2008 15:23
ايه رايكم نبدأ و نكتب بعض الحلول اللى احنا شايفينها حتى لو كانت تافهه و تقوم ادارة الموقع بعمل تجميع لها فى بوست منفصل و ناخد الموضوع بجد علشان نلاقى حل او حتى على الاقل نلاقى بعض حلول غير تقليدية لعل و عسى يقراها احد متخذى القرار
مثلا:-
تنظيم عملية مرور القوافل ( السفن ) فى ساعات الذروة
عمل مظلات داخل المعديات لتقى الناس الشمس و المطر
رفع قيمة التذكرة لسيارات خارج بورسعيد وليكن جنيه من كل اتجاه
تشغيل احد المعديات بالرسوة بمبلغ معقول وليكن جنيه من كل اتجاه لتكون استثنائية و تستخدم هذه المبالغ لتحسين الاداء بالنسبة للمرفق بالكامل
|
5. أضيف بواسطة محتار من بورفؤاد, في 17-09-2008 15:28
صباح الفل
المصيفين روحوا من اول رمضان
و المشكلة قائمة عادى جدا
و بعدين عسكرى مرور مين اللى هينظم عدم دخول العربيات من الجنب خليك واقعى
و رمضان كريم
|
6. austria
أضيف بواسطة ivo, في 17-09-2008 22:01
حل مشكلة مرفق المعديات ليس بذيادة عدد المعديات او فرض رسوم على كاهل المواطنين لتحسين المرفق فهيئة قناة السويس لديها القدرة على ذالك فيجب ان يكون هناك حل جذرى نظرا للذيادة السكانية والنفق المذمع انشائة سوف يخدم مشروعات شرق التفريعة اكثر من خدمة سكان بورفؤاد فليس جميع المواطنين لديهم سيارات لعبور هذا النفق والحل الامثل بجانب انشاء هذا النفق هو انشاء مترو انفاق يربط بين ضفتى القناة هذين المشروعين لايتعدى الثلاث مليار جنية فلماذا تبخل الدولة على بورسعيدبالرغم الدخل القومى من مشاريع الغاذ المقامة على ارض بورسعيدعلى الجانب الاخر اصدر الرئيس مبارك اعداد الدرسات لمشروعى الاسماعلية الجديدة على مساحة 130 الف فدان شرق القناة وانشاء نفق قناة السويس الجديد ( الاهرام. 9 .11) ولا نعرف هل هو النفق المذمع انشائة لصالح شرق التفريعة ام لصالح مدينة الاسماعلية الجديدة؟
|
7. أضيف بواسطة محمد, في 19-09-2008 01:47
المشكلة دى ان شاء الله هتتحل بس محتاجة وقت اولا فى 5 معديات جداد بمكن جديد بتتبنى فى الترسانة ثانيا فى خطة لتطوير موقع الرسوة وتزويد عدد السقالات الى فيه ل3 سقالات فى كل بر وعدد المعديلت فى الرسوة هيبقى 7 معديات وكذلك تم استيراد عدد 20 ماكينة كاتربيلر جديدة لعمل احلال وتجديد لماكينات المعديات القديمة الصبر يا جماعة ان شاء الله كل حاجة هتتحل بس الموضوع ده مش هيتم فى يوم وليلة وعايزكم تنسوا موضوع المعدية تبقى بفلوس دى لان الهيئة بتقدم الخدمة دى لشعب بورسعيد بدون مقابل وحتى تذاكر العبور للسيارات اللى بيتحصل على ايرادها المجلس المحلى التابع للمحافظة وعلى فكرة كل العاملين فى المرفق من اصغر عامل بيأدوا واجبهم على اكمل وجه لخدمه الناس بدون انتظار لمقابل من الناس على الرغم من تعرضهم لبعض المضايقات من الجمهور والسب والتكبر استغلال السلطات والمناصب علشان كده انا بطلب منكم الصبر وحاولوا تساعدونا والى عنده اى اقتراح او فكرة لتطوير الخدمة يتفضل ويعرضها واحنا نحاول ان شاء الله ندرسها وننفذها اذا كان فيها الصالح العام للجمهور اخمكم محمد عبد المعطى من مرفق المعديات
|
8. أضيف بواسطة نورا, في 28-09-2008 01:08
السلام عليكم
انا عايزه اعرف انت كاتب الوضوع ده منين وايه المصدر بتاعك اصل انا كتبت الموضوع وبنفس الطريقه ومش عارفه وصل هنا ازاي
|
9. أضيف بواسطة محتار من بوزرفؤاد, في 29-09-2008 20:53
الاستاذ محمد عبد المعطى
انا متفق معاك فى موضوع ان العاملين فى المرفق من اصغر عامل بيأدوا واجبهم على اكمل وجه لخدمه الناس بدون انتظار لمقابل من الناس على الرغم من تعرضهم لبعض المضايقات من الجمهور والسب والتكبر استغلال السلطات والمناصب فى عز البرد و فى عز الحر بدون اى اعتراض و ايضا المضايقات بوقوف بعض الناس على باب المعدية علشان تخش بالعافية
كان الله فى العون
|
10. أضيف بواسطة zico, في 04-10-2008 22:16
تفتكروا الحل محتاج وقت لحد امتى بالضبط
يعنى السادة اللى فى ايديهم القرارات شايفين ان الوقت المناسب امتى
اصل المرسى الواحد بيقعد سنة او اكتر علشان يتعمل
فياترى المعدية بتتبنى فى اد ابه
و بعدين طاقة الترسانة انها تعمل كام معدية فى السنة وهل فيه ميزانيات مخصصة للموضوع ده
يعنى قدامنا كام سنة و عدد السكان هيكونوا كام ساعتها و هنكون محتاجين ساعتها كام معدية و كام مرسى
مع الاحترام للناس كلها بلاش شغل العلاقات العامة ده وخلونا بتكلم بجد
|
11. أضيف بواسطة MishMish, في 06-10-2008 00:13
صاحب الموضوع عضو معانا في المنتدي وهوة كاتب الموضوع دة من تأليفة الشخصي
وماظنش ان يكون فيه وحهة شبة بين موضوعك وموضوعة ؟؟
|
12. أضيف بواسطة ahmed abd elwahab, في 06-10-2008 14:46
          
|
13. الى الاستاذة نورا
أضيف بواسطة zico, في 08-10-2008 00:42
مع احترامى لحقوق الملكية الفكرية
وحقك فى انك تسالى
يس انا شايف من وجهة نظرى ان الموضوع عام جدا و بالرغم من انه مكتوب كويس الا انه مافهوش اى اختراع فى الكتابة
قانا شخصيا اشكرك على الكتابة عن هذا الموضوع ولكن انا كنت عاوز اسال
انتى نشرتى الموضوع ده فين قبل كده ؟
وبعدين ياريت نركز فى الموضوع نفسه وبلاش المواضيع الجانبية اللى دايماتخلينا نبعد عن الموضوع الرئيسى
|
14. fgfgfg
أضيف بواسطة fgfg , في 16-10-2008 13:59
|
15. port said
أضيف بواسطة s shehab , في 16-10-2008 15:33
بصراحه اللى عامل مشكلة المعدية هما عمال المرافق نفسهم مع احترامى للاستاذ اللى بيشكرهم على دورهم لان يبقى الواحد واقف ساعه فى الصف وتلاقى واحد بيعدى من صف الطوارئ اكتشفت بعد كده انهم زمايلهم واقاربهم ولو حد غريب عدى يغمز عامل المرافق ب10ولا 20جنيه يقوله اتفضل يل باشا ولما الواحد يتكلم يرد العامل بكل بجاحه وقلة ادب اصله ضابط ارجو الغاء هذا المرفق على فكره كلمة مرفق يعنى خدمة ودى مش خدمه ابدا دا اسمه ابتلاء وشكرا
|
16. النجدة الغوث من المعديات المؤلمة
أضيف بواسطة
هذا البريد محمى من المتطفلين , تحتاج إلى تشغيل الجافا سكريبت لمشاهدته
, في 19-10-2008 18:15
السلام عليكم ورحمة الله وبركاتة
والله يا أخوانى و يا أ حبابى أدعو من الله أن يفرج هذة الزمة والمحنة التى يعانى منها كل سكان بورسعيد وبالأخص سكان بورفؤاد هى والله هيئة قناة السويس تساهم بكم كبير جدا"وليس باليد حيلة لكن المشكلة تكمن فى حكام الدولة الذين تركين هذأ الأمر ولا يعانون منةفلو سمحتم لو فى أحد مسؤل يتكلم فى مشروع نفق أو كوبرى من أى جهة تسهل مرور السيارات والمعديات ممكن تعمل لأجل المشاة وشكرا" على حسن إستماعكم
|
17. مرفق المعديات بورفؤاد - بورسعيد
أضيف بواسطة حسام لطفى , في 19-10-2008 18:45
انا من سكان بورفؤاد ومن المعذبين بسبب مرفق المعديات واذ اننى اعبر عن سعادتى وشكرى لكل من ساهم فى الكتابه فى هذا الموضوع لايجاد حل له وانا لى رائ ووجهه نظر ربما تكون متشائمه كتير ولكن للاسف هى الحقيقة ... لذا احب اعبر عن رائ بان مشكله المعيات ببورفؤاد هى مشكلة الحكومة والمحافظة والهيئة ويجب عليهم ايجاد الحل المثالى فى اسرع وقت لان هذا يعتبر تقصير واهمال كبير من قبلهم وانا بقول كده قبل ما تقع الطوبه فى المعطوبه كما يقولون نحن لا ننسى اهمال الحكومه ورقابتها على سفن الركاب عبر البحر الاحمر وغيره مما ادى الى كارثة العبارة السلام ... وكمان لا ننسى فى اهمال الحكومه وعدم اتخاذ الاساليب لعدم وقوع كارثة الدويقه وسفح جبل المقطم مما ادى لانهياره بما فيه من ارواح ....واخرها فى بورسعيد الاهمال الذى ساد البلد من مراقبه شركة النظافة ببورسعيد وبورفؤاد حتى اصبحت المدينتين مقلب زبالة تتطايرة الرياح واصبحت القمامه من معالم بورسعيد وبورفؤاد وفى اجمل الاحياء .....فما بالكم من اهمال الحكومة والمحافظة والهيئة اتجاة موضوع المعديات فماذا لو حدث لمعدية واحدة وهى تعبر لاقدر الله من اى عطل او اى شئ فى علم الله وغرقت المعدية بما فيها من ارواح وممتلكات وانتم تعلموا بان البحر برضه غدار وقد حدث من قبل حوادث بسيطة تسببت فى ذعر شديد على ركاب المعديات من تصادم بين المعدية والسفن العابرة او جنوحها لاى سبب واوعى حد يقول لى لى بان المجرى المائى صغير والهيئة ممكن تنقذ ,,,صدقونى ساعة القدر بيعمى النظر ....انا اسف على هذه الرؤية او التصور بس انا اول الخائفين على ركاب المعديات كلهم اهلى واصدقائى ....ولقد عجبنى مقوله شخص على هذا الموضوع حيث يقول هو فيه اصلا حاجه اسمها معديات الايام دى ...كلامه مضبوط جدا ....لا حل غير عمل كوبرى او نفق ومزود بقطار او مترو لاشخاص الذين لا يملكوا سيارات ...يا حكومه يامحافظة بورسعيد انظروا بعين الاهتمام على اهل بورفؤاد إنهم يعانون من قسوة عبروهم من بورفؤاد الى بورسعيد والعكس تعالوا شاهدوا وجوه العابرين لقد اسمرت وجوههم من قسوه الشمس فى الصيف او خلال العام كله وما بالكم من رصاص البرد فى الشتاء صواريخ تدخل الاذن ولا يتحملها البشر ....سبحان الله ...ربنا يقويكم يا سكان بورفؤاد بجد ويحمييكم ويعوض صبركم خير ....وفى النهايه انا برضه بحترم مجهود الهيئة والعاملين بها على طول خدمتهم لهذا المرفق من ساعة ما اتعمل
|
18. أشكركم على إثارة مثل هذا الموضوع الهام ج
أضيف بواسطة محمد, في 20-10-2008 13:47
أتقدم بالشكر لكتاب الموضوع لما فيه من أهمية كبيرة
كما أطلب من إدارة الموقع التكرم بتثبيت الموضوع ويكون دائما تحت النقاش حتى يتم إجاد الحل وتنفيذة
حيث أن هذا الموضوع من أهم المواضيع لشعب بورسعيد وخاصة بورفؤاد
لا أريد التطرق لموضوعات جانبية ولكن أحيي أخواني على شجاعتهم حيث أن هناك مشكلة كبيرة جدا جدا وهي مشكلة نفسية
حيث بكل سهولة تجد من يأخذ دورك من أصحاب المعارف والسلطات وغيرهم وهم طبعا معرفون وقانا الله شرهم وشر صحبتهم
وبلا اي إحساس يغتصبون حق الغير حتى في رمضان
وكأنهم غير البشر ولا يجب الاختاط بينهم وبين عمة البشر
والمشكلة الثانية هي : لو أنهم يقفون في الصف وينتظرون دورهم إذن سيشعرون بما نعاني من أزمة المعديات ومن الممكن أن يتكاتفوا معنا لإجاد الحل
ولكن من لاشعر بما تشعر لن يفكر مثلك
وإليهم وإلى أخواني بمرفق المعدبات أتقوا الله فينا وفي النساء وفي الاطفال
وكم من الحقوق تضيع بمثل هذه الصورة
والأن أسف للإطالة
وأرجع للموضوع الأساسي
أخوني عندي فكرة جيدة أو كما أراها لإنشاء كوبري يربط بورسعيد ببورفؤاد وإن شاء الله سأقوم بتصميمة ودراسة التكلفة فأنا أعمل مهندس في هذا المجال
فكرت كثيرا في هذه الفكرة ووضعت لها الخطوط العريضة
وفى حاجة الى دعواتكم لإنهاء الفكرة بالكامل
وإن شاء الله تعود بالنفع لنا جميا ولكن لمن سأقدم المشروع بعد الانتهاء منه؟؟؟؟
مقابلات المسؤلين تحتاج الي مسؤلين لتزليل الصعاب أي ليكونوا لك وسطه عند المسؤلين .... لنا الله
وأرجو من أخواني إثارة موضوعين هامين
أولهما : المحسوبية في طابور المعدة
والثاني : توصيل الغاز الطبيعي الى بورفؤاد
شكرا لقرائتكم ومروركم الكريم
وتفضلوا خالص شكري وتقدير
والسلام عليكم
|
19. زهقت
أضيف بواسطة بورفؤادى, في 23-10-2008 19:49
والله العظيم إحنا شعب طيب ... وأهبل برضه .. إنتم متخيلين إن ممكن يكون فيه حل .. تصبحوا على خير ... لغاية ماما الحكومه ماتيجى تصحيكم على مصيبه ... ( أحلام سعيده )
|
20. أضيف بواسطة محمد ميكانيكى بالمعديات, في 25-10-2008 15:57
انا محمد ميكانيكى بالمعديات طبعا انا مع كل هذه الشكاوى والاراى لابد من حل المشكل نهائيا بعمل نفق بسبب الاضرار الناتجه من ركوب المعديات وحالات المعديات التى لا تصلح للملاحه وانا طبعا عارف حالات المعديات كلها سواء فى موقع التفريعه (2معديه) أو الرسوه (2+1معديه) او موقع بورسعيد (7معديات) وعارف طبعا اليه اللى بيحصل علشان يجيبو تصريح من السقرطاه ( مندوب الامن البحرى ) للاسف محدش هياخد موقف الا لما يحصل نصيبه فى القناه طبعا الناس بتقول دى هيئة وارباحها عاليه حالات الماكينات سيئه جدا والرفاصات وكمان العادم الخارج فى كل المعديات والتلوث البيئة وعلى نظام تشغيل الورادى للعاملين بالمرفق مما فيها من وساطه ومصالح شخصيه من المهندس >>>>>>>>
وطبعا لنا الله وليكى الله يا مصر
برجاء محاسبه هلا المدرين للموقع للحالات المعديات وامكانيات تطويرها وجلب عمال( بحرين / ميكانيكيا ) وتوزيع الورادى بالعدل مش بالمصالح والمنفعه للان اختناق المرور وحالات الاختناق تانج بسبب اعطال المعديات الكثيره وعدم وحود افراد لتشتغيل المعديات بسبب عدم الاداره بضمير والمصالح الشخصيه
|
21. تعاونيات الزهور ع السلام م2 ش15
أضيف بواسطة محمد حسين ابوالورد, في 01-11-2008 08:20
من عشرةسنوات كنت من سكان بورفؤد واعلم معنات سكان بورفؤاد واعوزبالله من قول انا من العملين بهئة قنات السويس ومن موقعى بالهئه اقترحت ان نختارمن المعديات معديتين للعمل اسناء الشبوره ونضع عليهم سستم من اجهزت السى فكس الموجوده اصلا بالهئه او وحدة رادار قصيرة المدى وعرضة ان اعمل بدايتا عليها حتى نقوم بتعليم الاوخه قباطنة المعديات وانى اكرر طلبى هذا ويوجد بالهئه من يقوم بهذه المهمه لانى الان بالمعاش والله المعين واسلام عليكم ورحمة الله وبركاته محمد ابوالورد
|
22. تعاونيات الزهور ع السلام م2 ش15
أضيف بواسطة محمد حسين ابوالورد, في 01-11-2008 08:41
السلام عليكم ورحمة الله وبركاته لى اقتراح آخر الان قافلة سفن الجنوب تخرج من التفريعه وقليل جدا منها من ياتى للدخول الى ارصفة البضائع فلهذا الوضع يمكن عمل كبرى عائم عند الرسوه يفتح لوقت قليل جدا عند دخول قافلة الشمال الاولى وعند دخول بعض سفن قافلة الجنوب وهذا حل مؤقت لحين ان تحل هذه المشكله التى تتضخم كل يوم للزياده المستمره لكم السيارات وليس لها من دون الله كاشفه والسلام عليكم ورحمة الله وبركاته
|
23. بورسعيد ـ بورفؤاد
أضيف بواسطة اجمد , في 01-11-2008 10:56
nullمن فضلكمابااصحاب القرار اتقوا الله فينا وفى بلدنا بورسعيد واعملوا على حل مشكلة المعدبات وسبق لمحافظة الاسمماعلية ان تصدت لهذه المشكلة وبالاخص مدينة القنطرة بعمل كوبرى (معبر) مثل الذى عبرت عليه قواتنا فى حرب 1973 يفتح فى وقت الزرة وفى الوقن الذى لاتمر فيه السفن العابرة للقناة كحل موقت لحين دراسة انهاء هذه المشكلة وشكرا
|
|
- من فضلك اضف تعليق يتناسب مع الخبر.
- أي اهانات أو شتم سيتم حذفها.
- لا تنس اضافة الكود الأمني الموجود بالأسفل.
|
|
أرشيف الأخبار 
التعليقات & التفاصيل (23)
الخط الساخن ، الأن على موقع بورسعيد أون لاين 
أخبار مكتبة مبارك العامة ببورسعيد 
