عبد المنعم أحمد دبل ، محل الميلاد بورسعيد 29-7-1968 ، كنت فى مدرسة ملحقة المعلمات الابتدائية وكانت امنياتي وطموحاتي الإلتحاق الازهر إلا انى لم ألتحق بة ودرست خط عربي وحصلت على دبلومتين فى وقت واحد وكانت طموحاتي دينية ، التربية والنشأة : كانت حث على الصلاة .. حث على حفظ القرأن ، وطلعت الاول فى بورسعيد فى حفط جزء عم وانا صغير ، حفظت القران الكريم بفضل الله كاملا .. قراءة وتجويد لوحدى عن طريق السمع !

عبد المنعم احمد دبل والجامع التوفيقي ؟

مسكت المسجد التوفيقي ومن قبلة العديد من المساجد الاخري و بيسمونا احنا خطباء مكافأة ! ومع اول سنة فى الجامع التوفيقي حصل نجاح باهر وصار التوفيقي المسجد الاول فى البلد .. وكانت المسألة لوجة الله ليس فيها مقابل .. لما يكون الامام دايما متطوع بيكون لدية مصداقية أكبر عند الناس ، عملت علاقات وصداقات لله سبحانة وتعالي ، وهذا الجامع لة فضل عليا حتي اقترن اسمي بالجامع " الشيخ منعم بتاع التوفيقي " ! صلاة الفجر كانت تشبة صلاة الجمعة فى الجامع التوفيقي ! والناس كانت بتصلي فى الشوارع فى صلاة الفجر ! وبفضل الله المسجد التوفيقي عمل حاجة للبلد ، وكان نفسي ان الموضوع دة يستمر لكن كلة بقدر الله .

هل هناك دورات تدريبية لآئمة المساجد قبل إعتلاء المنبر ؟

لا مفيش ! خطبة الجمعة : تذهب هباءا منثورا فى كل مساجد المسلمين ولا أري منها نفع إلا فى بعض المساجد ! فى القليل منها ! لان طريقة الإلقاء وطريقة التلقي .. الاتنين فيهم خطأ كبير جدا ، فلازم يكون فية دورة تدريبية من الاوقاف !

الاسلام والحياة ؟!

من مصلحة البلد ان الشباب يكون متدين ومن مصلحة الحكومة ايضا ! محتاجين ان الاسلام يكون بينا فى معاملتنا وانا هنا بعيد عن السياسة وبعيد عن التطرف فأكيد كلنا هنستفيد كمثال : على اقل تقدير بنتي راحت الدرس .. راحت تجيب حاجة .. راحت مع والدتها : هكون فى امان عليها !! لكن لو دلوقتي نزلت .. هل سأكون فى امان عليها ؟ !لا بالطبع لن اكون فى امان عليها ولا على اختي ولا على ابني كمان !!

هل تأثرت بشيخ معين ؟

فى البداية كان تأثري بالشيخ محسن عطايا امام مسجد السماح بجوار قسم المناخ ، وكان استاذي ! كان اسلوبة بيجذبني .. ومازال استاذى طبعا وتأثرت حتي بأسلوبة نتيجة سماعة كتير حتي اسلوبي فى الخطابة كان قريب منة حتي المقدمة حتي فى الحشايا بتاعت الخطبة ، لكن حصل بعد كدا تفرد بالأسلوب

ما هو موضوع اول خطبة ، وما شعورك اول مرة امام الجمهور الكبير ؟

اول خطبة دائما لاى خطيب بيكون موضوعها عن " الموت " معرفش اية السر فى كدا ! ربما لان الموضوع لة تأثير وهوة طالع علشان يفتح القلوب والموت دايما هو مفتاح القلوب !! وربنا بيوفق .. فمن اول خطبة لقيت فية قبول ! خطبة الجمعة امانة .. وانا بزعل من كل الخطباء اللي مش بيدوا للخطبة حقها ، وكان عندى بعض الخوف .. الارتباك لا ينشأ من مواجهة الجمهور ولكن من مواجهة نفسك ! عندما تشعر بالفراغ بأن تطلع الى المنبر وانت مش محضر ومش جاهز وهذا ممكن ينشأ بحكم انك خاوي من جوة ودة كان بيحصل فى البداية يعني ! وايضا الخطيب اللي بيحضر الخطبة قبل الجمعة بأيام قليلة مثلة مثل التلميذ اللي بيذاكر ليلة الامتحان ! وبعد ما يخلص الامتحان تسألة عن اى حاجة فى المادة ميعرفش يجاوب عنها ! وطبعا دة بيخلي فية ركاكة فى الاسلوب زي ما يكون بيرمي الكلام ! ودة خطأ كبير ، اللي بيحصل من اى خطيب انة المفروض يحضر خطبة الجمعة من يوم الاحد او من الاثنين وطبعا مفروض الخطيب يكون حافظ القرأن الكريم ومجود للقرأن ودة شيء اساسي! لان الذخيرة الكبري فى القرأن واحاديث الرسول صلى الله علية وسلم والاحداث والمواقف التى تدعم الخطبة ، وبيجمع خيوط الموضوع وبيطلع متوكل على الله سبحانة وتعالي ، وفية اشياء بتكتسب وربنا بيمن عليك بيها اثناء ما انت على المنبر وهذا رزق جاي للمستمع !! وان يكون ملم بالاحداث المحيطة بة مش سياسية فقط .. بل واقتصادية وكل شيء ! حتي فى طريقة تعامل الناس فيما بينهم علشان لما يجيي يتحدث عن شيء فلا يتحدث بلسان الجاهل بالأمر ! وعلى الخطيب الا يستجيب للمؤثرات زي ما يكون حد سخنة ! وهذا ما سيجعلة يفقد مصداقيتة عند الناس !

مسألة دعم حزب الله والدعاء لة ؟

شوفت ما شاء الله ناس ليهم ثقل ولما اتكلموا ضد حزب الله او انهم شيعة ولا يجوز نصرتهم او الدعاء لهم : فقدوا مصداقيتهم عند الناس .. شوفت فى بورسعيد ناس بالطريقة دى .. وقد سأل واحد من هؤلاء الناس اللي كانوا بيتكلموا ضد الشيعة قيل لة : لو ان الصين حاربت اسرائيل .. فماذا تتمني ان ينتصر فى الحرب ؟ فرد قائلا : الصين طبعا ! فكان الرد علية : رغم ان الصين لا يعبدوا إلة بينما اسرائيل اهل كتاب !

ايضا من يعترض على حزب الله لانهم شيعة .. ماذا قدم هؤلاء لحركة حماس السنية الفلسطينية ؟!

اري ان من اصدروا فتاوي ضد نصرة حزب الله دى فتاوي لتبرير بعض التصريحات الغير مسئولة من ناس كبار ، الشيعة رغم انهم درجات ورغم انهم مختلفين فيما بينهم لكن فية منهم ناس من اقرب ما يكونوا للأعتدال ! لكن بردة عندهم بعض المبالغات ولكن دة لا يمنع انهم لما يقاتلوا حزب الله هل معقولة هتمني ان اسرائيل تهزم حزب الله ؟!!! خلينا منطقين وواقعين .. هما فى لبنان الذين تولوا المواجهة .. وهما فى ايران الذين تولوا المواجهة مع امريكا .. طب احنا فين من دة كلة ؟ احنا وقفنا النهاردة مكتوفي الايدي حتي المشاركة بالكلام معملناش فيها حاجة ! اذا كان العدو مشترك زي مثلا لما الشعب كلة بجميع طوائقة قام لإخراج الانجليز من البلد ! محدش بص فيهم بقي انت مسلم وانا مسيحي !! الناس كلها قامت لان فية هناك مصلحة مشتركة ، النهاردة اسرائيل نفسها لما تنظر فيما بينهم تلاقي فية تفرقة وعنصرية جواهم وكرة وبغض لبعضهم البعض! ولكن تجدهم النهاردة فى صورة المتحدين ومن وصلهم الى كدا ان فية حالة حرب مع العرب حالة الحرب دى جمعتهم !! النهاردة كمسلمين مفروض نكون ملة واحدة ولكن مع ذلك متفرقين ومتحزبين سياسيا واقتصاديا ومفيش اى اتفاق فى شيء !

اهم الكتب التي تدعو الناس الى اقتناءها ؟

لازم يكون عند الناس كتاب فى تفسير القرأن زي تفسير ابن كثير ، ولازم يكون فية كتاب فى الحديث زي كتاب رياض الصالحين ، وكتاب فى الفقة زي فقة السنة او الفقة الواضح للدكتور محمد بكر اسماعيل ، وكتاب فى السيرة زي الرحيق المختوم دول لازم يكونوا موجودين فى اى بيت ، ومهم اوي ان كل واحد عند كتاب يقرأة ، لكن مشكلتنا بردة اننا بناخد قشور من كل كتاب !

هل وسائل الدعوة الى الله عبر المنبر فقط ؟

المعني الاشمل لذكر الله هو الدعوة الى الله " فأذكروني أذكركم " ذكر الله ايضا بمعني الدعوة الى الله وافضل الطرق للدعوة هي الدعوة بالقدوة بمعني ان لازم الداعي يكون قدوة فى ذاتة ولا يكون مخالف لما يقول ! فلا يجوز ان ادعوهم للصدق والاخلاق واكون انا بكذب او خائن ، لقد كان لكم فى رسول الله اسوة حسنة ... ومشكلتنا ان نجوم المجتمع مش هما القدوات اللي ربنا قال عليهم زي الشباب المطربين او بنت ممثلة يقال لها : ملكة الأغراء !! وهذا هو ما يحرص علية اعداء الاسلام بأن يفسدوا الاسلام من الداخل

الصحوة الاسلامية فى مدينة بورسعيد وفى مصر بصفة عامة ؟

احنا بنحكم على الصحوة الاسلامية من حيث القوة والضعف من المظهر ! لما نجد شباب ملتحي او شباب مقصر جلبابة واخوات منتقابات طبعا دة خير لكن مش هية دي الصحوة الاسلامية ! الصحوة الاسلامية هو اننا نشعر بأن الاسلام اصبح هو الذي يدير حياتنا ، احنا حياتنا بتدار بالاسلام ! المفروض يكون الاسلام هو محور حياتنا لاننا كلنا بندور حول فلك الاسلام فلابد ان يكون هو المحرك والمنظم ! هناك علاقات كثيرة لابد ان تنظم طبقا للإسلام .. بأن يكون محور حياتنا كالعلاقة بين الزوج والزوجة والاب والابن وضابط الشرطة والمواطن والطبيب والمريض والمالك والمستأجر ، كل دى صور فى الحياة .. كل واحد لازم يعرف ان لة حقوق وعلية واجبات وهذا هو الأتزان الحاصل فى كل الدول المتقدمة ! فعندما ننظر الى اوروبا : نراهم قد تقدموا ليس بالاسلام لانهم لا يؤمنون بة ! ولكنهم تقدموا بتعاليم الاسلام .. وجدوا ان حياتهم لن تقوم إلا بالعدل ! فلما بيحصل مساواة بين الكبير والصغير عندهم بيحصل استقامة فى كل شيء !

كيف تم اختيارك للسفر الى الولايات المتحدة الأمريكية ؟

الاختيار كان عن طريق بعض الاحباب كان معاهم بالقدر اسطونات وخطب ليا فسمعوها هناك فى المركز الاسلامي فى فلوريدا ، ولم يتم عن طريق مسابقة فى الاوقاف ! انا راضي بحالي وهذة اول سفرية ليا خارج مصر لانى لم اكن مقبل على فكرة السفر خارج مصر رغم عروض السفر الكثيرة الى العديد من الدول الاوربية

طموحاتك فى هذة الزيارة ؟

الهدف هو اننا نحول الاسلام لواقع ، ودة شيء صعب ! النهاردة ناس اعتادوا فى حياتهم على شيء معين : وانت هتبدأ تنظم لهم حركة الحياة ، النهاردة رايح لمجتمع فية مسلمين امريكان يعني طريقة حياتهم : طريقة امريكية ! واللهي هننظر لحياتهم ما هو الموافق للإسلام واية اللي مش موافق لة ! انا رايح علشان احل مشاكل الناس دول وادعوهم اللى الله سبحانة وتعالي واعلمهم مباديء الدين .. علشان كدا الارض هناك خصبة محتاجة حد يغرس فيها البذور ويرويها ويتعهدها وربنا هوة اللي هينمي و يكتب لنا القبول

وبالنسبة لطموحاتك فى الحياة بصفة عامة ؟

طموحاتي كلها فى مجال الدعوة الى الله ان ربنا يوفقنا فى الدعوة الى الله ، بان اتفرغ للدعوة وان ربنا يرزقنا الاخلاص

كيف تعرفت على موقع بورسعيد أون لاين ، وهل هناك افكار تود ان تراها قيد التنفيذ ؟

عن طريق موقع البحث جوجل ، حيث كنت ابحث عن اسم الجامع التوفيقي فدخلت ! وشفت القسم الخاص باللهجة البورسعيدية والموضوع حلو جدا وكان نفسي اطبعها !! البلد دى طيبة وقيمة مهما الواحد يلف ويروح ويتغرب فالبلد دى فى دمنا كلها ودة بصدق ، بشعر ان البورسعيدية بينتموا لبورسعيد يمكن اكتر من اى بلد تانية على مستوي الجمهورية ! وربنا يوفقكم لانكم بتعملوا عمل جميل ! ونفسي تعملوا حوار مع الغرفة التجارية والحاج محمد المصري عاوزين نعرف حق التجار فى بورسعيد واية اللي انتوا بتقدموة للبلد .. دة جانب ، الجانب الاخر : حوار مع المجلس المحلي واية اللي بيقدموة للبلد؟ احنا النهاردة عايشين فى بيت واحد ، بورسعيد دى بيتنا لازم الفرد يكون شايف ان البلد دى كلها بيتة وهوة ماشي فى البلد بمنتهي الاطمئنان ! وهوة عارف بيوتها وعارف شوارعها وناسها ، فالنهاردة لما اشوف واحد بيرمي ورقة فى الارض : مش محتاج ان انا حد يقول لي : دة كدا غلط ! لان انا فى بيتي !! الفكرة : ان اى واحد بيخرب فى مرفق من مرافق البلد : فانا المتضرر فى الاخر ! اللي مش عاوز يشعر بالشعور دة يبقي مش منتمي لبلدة ! اللي بيعمل لذاتة من خلال منصبة : يبقي مش منتمي لبلدة .. القوة فى ترابطنا وتماسكنا واحساسنا بالانتماء للبلد وانا شخصيا حاسس ان انا منتمي ليها وبحبها جدا بكل ما فيها.. نفسي البلد دى تبقي احسن بلد فى العالم

نصيحة للشباب ونحن فى شهر رمضان

انصحهم ان يكون رمضان هو البداية وليس هو النهاية ، رمضان لابد ان يكون هو بداية العودة الى الله ، اللي بيشرب سجاير يبطل ! اللي عندة خلق معوج يرجع الى الله تعالي ، اللي مقصر فى طاعة معينة يبدأ يعود الي الله تعالي ،

بعض أيات من الذكر الحكيم من تلاوة الشيخ عبد المنعم دبل .. أضغط هنا!

شــــــــــكرا لـلشيخ عبد المنعم دبل إمام المسجد التوفيقي سابقا على حوارة الصحفي معنا ، والذى تم إجراءة معة قبل شهر رمضان الكريم ، وكل عام وانتم بخيــــــــــر !

~~~~~~~~~~~~~~~~~~~~~~~~~~~~~~~~~~~~~~

تستطيع أن تقدم تعليقك على هذا الحوار الصحفي فى تلك الصفحة !!

روابط تشير إلى هذه الإضافة

الإسم

البريد الإلكتروني

الموقع الإلكتروني

العنوان

التعليق

تصغير | تكبير

الرجاء إدخال الحروف الظاهرة.

أضف تعليق استعراض